في اول تعليق على معاناة عائلة النائب جورج عقيص في اليومين الماضيين قبل ثبوت عدم اصابته بفيروس كورونا، وبعد الحملات التي طالته عبر وسائل التواصل الاجتماعي وفبركة الاخبار في محاولة لتشويه صورته، كتبت زوجة النائب “ميشلين عقيص”:
“ولا مرّة سبق وكتبت اي بوست سياسي. عشت مع زوجي عالحلوة والمرّة بس ولا مرّة تدخّلت بشغلو، لأن دايماً كنت قول مش ضروري زوجة القاضي تصير قاضية، او زوجة السياسي تصير سياسيي. ولأن كنت دايماً واثقة انو زوجي بياخد الخيارات والمواقف المناسبة وانا مهمّتي ادعمو واوقف حدّو.
اليوم بعد هالتجربة التي تعرّضنالها بدّي خالف واحكي لأول مرّة اللي بقلبي:
جورج عقيص ولا مرّة حَقَد ع حدا، ولا مرّة قِبِل انو حدا من عيلتو او فريقو يهاجم حدا من اخصامو.
نحن عيلتو قبل غيرنا دائما بفاجئنا بهدوئه وحكمته وسلامه الداخلي.
من ٣ ايام لليوم كان هوي عم بروّقنا، وعم يهتمّ بنتايج المقربين منو واللي خالطن اكتر من اهتمامو بحالو.
لكلّ اللي هاجمو زوجي بهاليومين بحبّ قلن هالكلمتين وانشالله يفهموهن:
١- بعزّ دين الكورونا كان جورج عقيص عم بساعد العالم، وما رح قول كيف ومين ووين لأن مش شغلتي خبّر، بس اكيد في ناس عندها وفاء هيي اكيد بتحكي شو كان يعمل
٢- من بعد ما عمل الفحص وقالولو بمستشفى الهراوي لازم تعيدو بعد يومين، كان فيه جورج عقيص يختفي يومين وما يخبّر لأن ضميرو ما طاوعو تجاه كل اللي اختلط معن.
٣- الفحص الاول طلع غلط من اساسو، ولو ما وزير الصحة قام بواجباته بكل مهنية وصدق واخذ عينة اول فحص ورجع عادها بمختبر آخر، كنا بعدنا لليوم مش عارفين الحقيقة. ولكن الفحص التاني اللي عملو اليوم الصبح اكّد الحقيقة.
٤- زوجي ما معو كورونا بس عندو اخلاق. صفر كورونا وكتير اخلاق. يا ريت القلوب السودا بتزيح من دربو ومن درب اللي متلو.
وبالآخر بشكر كل حدا سأل عنا وبتمنى ما حدا يعيش الخوف اللي حسّتو عيلة جورج عقيص، ولكن بتمنى كل حدا يواجه ازماتو متل ما هوي واجهها”.
الاثنين 27 تموز 2020